Министерот за транспорт и врски Горан Сугарески и градоначалникот на општина Ранковце, Ивица Тошевски денеска извршија увид во изградбата на експресниот пат Ранковце – Крива Паланка.

Градежните работи се во тек и се очекува новиот експресен пат да биде завршен до средината на 2021 година, во рамките на рокот предвиден со договорот. 

„Експресниот пат Ранковце – Крива Паланка како дел од доизградбата на Коридор 8 е од особена економска важност за Република Македонија. Со него овозможуваме брза врска на Пан-Европскиот Коридор 8 кој нè поврзува со Бугарија, а со тоа отвораме можност за подобрување на економските врски со Европската Унија. Покрај регионално поврзување, со комплетирање на Коридор 8 и создавање на модерна патна мрежа ќе придонесеме за брз и безбеден транспорт на стоки и услуги и ќе им овозможиме на домашните компании полесно да се пробијат на нови пазари. Во таа насока го потпишавме и договорот со ЕБОР за реконструкција и проширување на патот од Крива Паланка до граничниот премин Деве Баир, со што создаваме комплетно нова патна делница на овој Коридор од значење не само за нашата земја, туку и за целиот регион“ – изјави министерот за транспорт и врски, Горан Сугарески.

Експресниот пат Ранковце – Крива Паланка е со вкупна должина  од 25  километри и вкупната вредност на инвестицијата изнесува 58, 5 милиони евра. Започна да се гради во јуни оваа година и согласно договорот треба да заврши во рок од 3 години.