Во рамките на Министерскиот совет на Транспортната заедница, заменик министерката за транспорт на Република Северна Македонија, Калтрина Зеколи Шаќири, оствари значајни средби со свои колеги од регионот и со претставници на Европската унија, каде што се дискутираше за заедничките предизвици и приоритети во областа на транспортот.

Во своето обраќање, заменик министерката Зеколи Шаќири ја нагласи важноста на стратешките инфраструктурни проекти за Северна Македонија, со посебен фокус на железничкото и патното поврзување, како и неопходноста од блиска регионална соработка во согласност со европските стандарди.

„Регионалната соработка и усогласувањето со европските стандарди се клучни за одржлив развој и целосна интеграција на регионот во европскиот транспортен пазар“, истакна Зеколи Шаќири.

Состанокот во Белград претставува важна платформа за размена на идеи, поставување на заеднички цели и забрзување на реализацијата на инфраструктурни проекти што ќе ја подобрат поврзаноста помеѓу земјите од Западен Балкан.