Завршува реконструкцијата на регионалниот пат Градско – Росоман – Дреново во должина од 12 километри, инвестиција вредна 1.3 милиони евра. На завршувањето на градежните работи денеска посета извршија министерот за транспорт и врски Владо Мисајловски и директорот на ЈП Државни патишта Александар Стојанов.

По целата должина е поставен нов асфалт и останува да се довршат уште неколку стотини метри и да се постави нова патна сигнализација.

-За прв пат оваа година издвоивме рекордни 22 милиони евра преку ЈП за Државни патишта за реконструкција на регионални патишта преку програмата на ЈП Македонија пат. Само оваа година издвоивме дополнителни 5.5 милиони евра за да ја подобриме патната мрежа низ Република Македонија. Градиме нови патишта, а воедно и ја подобруваме и постојаната патна инфраструктура нешто што го немало досега во Република Македонија, изјави министерот за транспорт и врски Владо Мисајловски.

Тој денеска направи увид и во изградбата на експресниот пат од Градско до Прилеп во делот на Дреновската клисура каде се врши интензивно пробивање на трасата.

-Задоволен сум како се одвиваат работите на терен. Трасата се пробива според планираната динамиката и континуирано се зголемуваат брјот на градежни работници и бројот на механизација кои се потребни за изградба на овој експресен пат. Исто така во тек е тендер за изградба на втората фаза од експресниот пат од Градско до Дреново очекувам на почетокот на следната година да започнат градежните работи и во рок од 24 месеци да имаме нов експресен пат од Градско до Прилеп, додаде Мисајловски.

При денешната посета директорот на ЈП за Државни патишта Александар Стојанов потенцираше дека интензивно се работи на изградба и реконструкција на регионалната патна мрежа во Република Македонија.

-Со завршување на регионалниот пат од Градско до Дреново веднаш ќе започнеме и со реконструкција на регионалниот пат од Росоман до Кавадарци во должина од околу 5 километри и инвестиција од околу 35 милиони денари. Се планира целосна реконструкција и поставување на нова патна сигнализација, изјави Стојанов.

Изминатите години се израдени и рехабилитирани околу 1300 километри патна мрежа во Република Македонија.